Sýning Guðrúnar Kristjánsdóttur Umritanir; Innsæi-Útsýni (Transcriptions; Intuition-View) í Listasafni Árnesinga er innsetning þar sem gerð er tilraun til að nálgast skynsvið að baki höfundarverki. Innsetningin byggir á nokkrum verkum frá árunum 1990-2000 í samtali við ný verk. Bókverkið Bláleiðir (2024) sem unnið var á grundvelli ævistarfs Guðrúnar varð kveikjan að endurskoðun á ferli listakonunnar. Í samvinnu við höfunda bókverksins og safnstjóra LÁ heldur Guðrún hér áfram að lesa í eigin verk og skoða hvernig listræn grunnkennd tengir verkin gegnum ólíka miðla, tískustrauma og flækju af aðstæðum og draumum. Samspil útsýnis og innsæis hljómar gegnum höfundarverkið og kemur fram í tilraunum til að leyfa andanum að umbreyta efninu, efninu andanum. Hér er gerð tilraun til að framkalla hið hulda gullinsnið í samhengi samtímans og tímaskekkjunnar, á tímalínu náttúrunnar og tímaleysis hennar.