Listsköpun Ilönu Halperin (f. 1973) einkennist af stöðugum og djúpum áhuga á jarðfræðilegri fagurfræði þar sem hún sameinar mannlega nálægð og ljóðræna sýn á mælingar og skilning á svokölluðum „djúpum tíma“. Hún fæddist sama ár og Eldfell gaus á Heimaey og hefur frá því seint á tíunda áratugnum reglulega dvalið á Íslandi í tengslum við rannsóknir sínar.

Frá árinu 2022 hafa þessi nýju verk tekið á sig mynd í gegnum vettvangsvinnu á jarðhita- og setmyndunarstöðum bæði á Íslandi og á Orkneyjum. Þar skoðar hún þessi svæði sem svonefnd „Mars-líki“ – landsvæði sem gera okkur kleift að tengjast plánetunni Mars sem nokkurs konar systurplánetu okkar.

Rannsókn Ilönu á 400 milljón ára gömlum strýtuþörungum og virkni hitakærra örvera í nútímanum hefur leitt af sér teikningar og grafíkmyndir unnar í mjólkurstein af jaðarlífverum, litaðar með jarðvegi og okkri, auk víðfeðmrar vatnslitamyndaraðar þar sem leitast er við að nema litróf Mars.

Á Mars má finna eitt stærsta eldfjall sólkerfisins, Olympus Mons, sem minnir á líkamsop þegar horft er á það úr flugi. Í kringum þetta risafjall teygir sig landslag fullt af gljúfrum, gígum, þakið rauðu litarefni. Slík jarðfræðileg mótun og mörkun skapar svokallað „kaoslandslag“, sem veitir listakonunni innblástur við nýjustu verk hennar.

Í gegnum annars konar nálgun við Rauðu plánetuna – þar sem hinsegin og feminísk sjónarhorn eru í forgrunni – býður Ilana upp á andóf við karllægum frásögnum um Mars sem „nýlendu“. Hún beinir kastljósinu að jarðfræðilegri arfleifð Mars og siðferðilegum álitamálum varðandi tengingu við aðrar plánetur. Með því að vinna í gegnum jarðsögulegar aldir þessarar fornu systurplánetu okkar og með fjölbreytilegum aðferðum – teikningu, skúlptúrum og ljósmyndun – dregur hún fram sýnishorn af efnislegri uppbyggingu Mars.